ابيض واسود

" نقطة ومن أول السطر "

بص انا هكلمك فى موضوع جامد جدا جة على بالى وانا بفطر سمك دلوقتى  ...

بغض النظر عن ان الكلمة الوحيدة اللى شدتك فى السطر كللة انى "بفطر سمك" .. تعالى نتكلم بجد .

الناس فى الدنيا دى نوعين :-

النوع الاول خط حياتة عبارة عن خط اسود

النوع التانى عبارة عن خط ابيض ولكن كل فين وفين هتلاقى نقطة سودة

واحد هيسأل نفسة امال مافيش حد خط حياتة ابيض بس لية !!

اقولك دى اسطورة كل الناس بتسعى لية لكن للأسف مش موجودة وبسبب ان فى ناس كتير زيك مصدقين ان ممكن يبقى حد خط حياتة ابيض دة بيأدى انهم بيبقوا فى قمة السواد وشايفينة ابيض وعن اقتناع تام واظن حياتنا مليانة بالناس دى .

.

.

القصة بتاعت الابيض والاسود دى هية لون مباشر او نتيجة لنفسك الحقيقية اللى هى فعلا انت حد كويس ولا مش كويس .. نفسك طيبة ولا مش طيبة .. كام حاجة كدة مع بعض بيتجمعوا بيحددوا انت لون خطك اية ... وعلى فكرة قمة العدالة من الله انك انت اللى بتحدد اللون دة مش اى حد تانى .

.

طيب لحد دلوقتى جميل وسهل جدا .. انما اية الفايدة من الموضوع دة بقى !!

 اقولك انا بقى القصة فة نقتطين بالظبط

النقطة الاولى :-

متخليش حد يضحك عليك ويقولك لونك .. لازم تحاول انت تعرفة  ومتضحكش على نفسك وتقنع نفسك بلون غير لونك وهقولك تعرفة ازاى .. هات يومك ال 24 ساعة وقسمة ساعات هيبقى معاك 24 ساعة .. ادى كل ساعة نقطة هيبقى معاك 24 نقطة امسك ساعة ساعة وشوف انت عملت فيها اية وللى عملت فيها حاجة صح ادى نفسك واحد .. واللى عملت فيها حاجة غلط ادى نفسك صفر .. وطبعا نصنا هيضحك على بعضة ويدى نفسة وحايد بس .. طب انا هقولك بقى على حاجة "افترض ان اللى انت بتعملة فى كل ساعة الناس شايفينك وانت بتعملة وشوف هتدى نفسك واحد ولا صفر .

ملحوظة .. الساعة اللى معملتش فيها حاجة شوف كنت بتفكر ساعتها فى اية .. ولو ملقتش نفسك كنت بتفكر فى حاجة ادى نفسك على طول صفر على الساعة دى لانة يعتبر وقت ضائع .

النقطة التانية :-

منع عملية التحول : بمعنى انك ممكن تبقى بالفعل الانسان الطبيعى اللى هوة خط ابيض وفية نقط سودة وتيجى فى مرحلة من حياتك وانت بتمر بنقطة سودة على سبيل المثال .. الاحتماليين اللى هيحصلو انك هتعدى النقطة دى وترجع للونك الاساسى او هتكمل فيها وتتحول بالفعل للون الاسود .

طيب انا عايز احافظ على نفسى .. وبما انى بالفعل انسان خطى ابيض عايز اعدى بسرعة من النقطة السودة دى بأسرع وقت وارجع للون الابيض بتاعى ... اعمل اية !!

ببساطة شديدة جدا فى حاجات كتير قوى نتكلم عليها للصبح بتأثر فى الفترة دى اهمها على الاطلاق الناس المحيطين بيك ..

فى منهم الابيض اللى فية نقط سودة ودة نادر لما هتقابلة فى النقطة السودة اللى انت بتمر بيها دلوقتى مثلا ..

انما اللى اكيد هتشوفهم فى النقطة السودة دى هما الناس اللى المحيطين بيك اللى خطهم اسود بما ان دة لونهم الاساسى اصلا .. فأى نقطة سودة هتمر بيها هتلاقيهم "دة بيتهم اصلا" .. وهيحاولوا يقنعوك انة عادى وان دة لون زى اى لون واننا مش ملايكة وان كل الناس كدة ومنتا شايفنى اهوة وعادى يعنى قشطاااات وبتاع وكل دة بيعدى .

كل بقى يا شاطر ما قدرت تقلل من تواجد الناس من النوعية دى فى حياتك هتعلى نسبة انك تمر من المراحل السودة دى فى حياتك حتى النقط نفسها هتقل لانك لما تخرج منها الناس اللى خطهم ابيض هيعلموك كتير قوى ازاى تتفادى النقط دى بعد كدة .

" المرء على دين خليله فلينظر أحدكم من يُخَالِل"

#msalah