جاهلية ... الجزء الاول
مصطلح سمعناة اكتر من مرة من بداية الاحداث
السياسية اللى بتدور فى مصر او فى العالم بصفة اشمل فى الفترة الحالية ... طيب هيا
اية الجاهلية
تعريف الجاهلية او عصور الجاهلية فى تصورنا
هوة الناس اللى كانت حواجبها كبيرة بيلبسوا خيش وعايش فى خيمة ... وبياكلوا معيز
بس .. وبيعبدوا الاصنام والتماثيل الحلاوة وأغبياء جدا جدا .
ودة اللى ممكن تتعلمة من الافلام العربى
القديمة بتاعتنا ... وزى اى فيلم عربى دينى قديم هتجد ان السيناريو التالى هوة
اللى بيحصل ..
بيبدأ يظهر الانبياء واللى بيأمن بيهم
وبرسالتهم بتبدأ حواجبة تبقى عادية وريحتة حلوة ... "مش عارف ازى بتبقى ريحتة
حلوة واحنا بنتفرج صوت وصورة !! "
وان الاسلام بينتصر بأن أحمد مظهر بيجرى
بالحصان وبييطلع فوق الجبل ويقول الله أكبر , لا إلة إلا الله محمد رسول الله ...
وتلاقى حواجبة صغرت "وريحتة بقت حلوة
بردة
!!
"... وأغرب حاجة فى القصة كلها ان دة
فيلم عربى دينى تاريخى وتجد فى أخرة كلمة "Finish" أو "the end" !!
كل دة كان عامل من عوامل التجهيل اللى كانت
بتحصل بطريقة مقصودة او عن جهل من الميديا العربى بتاعتنا واللى صورت الدين على انة
دش وحواجب وانك تطوع فى الجيش وتغزو .. وان الكفار كانوا أغبياء ولما تقلهم بصوا
على العصفورة بيبصوا "بغض النظر ن الناس دى دلوقتى طلعوا القمر واحنا لسة
بنطلع المقطم J "
وبعدت كل البعد عن ان اى تغير صحيح بيبقى
داخلى بحت وأكتفت بالمظاهر الخارجية حتى الاشارة لاى فكرة جديدة كان شبة معدوم ودة
كان من اسباب الدين الظاهرى الموجود دلوقتى .
كل اللى فات دة كان نقد سينمائى ملناش فية
تعالى نتكلم بالعقل شوية .. اية اللى هيختلف من عصر الجاهلية ودلوقتى او بدقة شوية
ايـــــــــــة هيا الجاهلية ... هل الجاهلية هيا عدم التقدم العلمى ؟ عدم التقدم
الثقافى ؟
كلمة جاهلية ببساطة جدا .. جاية من كلمة جهل
... الجهل بالشىء الجهل بقدرتة وطريقة عملة ... أى شىء .. هى دى الجاهلية !! بس كدة !! ... اة والله بس كدة ...
مش مصدق ؟ طيب ..
مثال صغير قوى ...
زمان كان الناس بتستخد الكواكب لمعرفة الطريق
وفصول السنة والوقت عشان الزراعة والسفر
والاحوال الجوية والطقس واواواواوا.... والى اخرة ... ودة قمة فى العلم والتقدم
والابداع ..
طيب لما تلاقى فى 2014 وعيد تانى ورايا 2014
ناس على درجة كبـــــــــــيرة جدا من العلم وكليات قمة ... وتلاقية بيربط جوازة
او ارتباطة او مناسبة لية ببرج حوت ولا طور ولا جدى ... لا والاجمل ان تلاقى مواصفاتة كمان
مكتوبة ومعروفة ...
وهنا بقى بيظهر الدوبلير بتاع المسيخ الدجال
... ودة فرد بيتواجد فى اى شلة بيكون على دراية كبيرة قوى بقصة الابراج دى وبيبدأ
يظبطلك او يحللك اى تصرف انت بتعملة بنائا على البرج اللى انت تابع لية ... او
ارتباطك بشخص اخر ودة هيعتمد على توافق البرجين ما بينكوا ....
على سبيل المثال ... برج الاسد من صفاتة
الانانية ... طيب دة عيب مين دة ... عيبى
ولا عيب البرج ولا عيب الاسد نفسة ؟؟؟
والكلام دة يلغى اى درجة علمية انت ممكن تكون
حصلت عليها ... مهما كانت ... انت لو بتقرا ميكى ماوس هتعرف ان كل الصفات دى
بتتوقف على مليار عنصر .. وأكيد مش بينهم يوم ميلادك العظيم ... وان دة الجهل
بعيـــــــــــــــنة ..
والقصة كلها انك بتتحلى بصفة سيئة وهى "الانانية"
.. وفشلت فى التخلص منها ... ودى صفة غير متواجدة فى فطرة الانسان يعنى انت مسؤول
مسؤولية تامة عنها وعن التصرف طبقا لها ... وبتدور على سبيل لاثبات ان دة طبيعى وان
دة وارد
وهنا انت جهلت بكل العقل والمنطق والعلوم الاجتماعية واحترام عقلك وعقل
الاخرين ... هتلاقى ناس بتتكسف تقولك انها مقتنعة بالحاجات دى ... وتلاقية بيقولك
"الحاجات دى طبعا مش صح .. لكن انا على المستوى الشخصى بحبها" .. لا
ونبى معرفتكش انا كدة !!
على فكرة دة مثال صغير قوى عن الجاهلية فى
الانسان وعقلة ... لكن دة اسهلهم ... ولو عايز امثلة تانية انا ممكن اكتبلك كتاب
فى علامات الجهل .اللى ممكن تعرف بيها الانسان اللى قدامك صالح للنقاش ولا لا ....
وفكـــــــــــــك خالص من الدرجة العلمية او الكتاب اللى هوة ماسكة فى ايدة
بيقراة طول اليوم كام الف صفحة ...
هتجد ناس معاها أدوات قياس كتيرة جدا ومبهرة
فى كلامها وتعريفاتها ومعلوماتها "ديكور" .... ركز معاة شوية هتجد التالى
استخدام ادوات قياس عقلية اة ومنطقية اة ولكن
فى غير مكانها .. يعنى اداة قياسية زى المتر فعلا اداة قياس علمية ومنطقية لكن لو
لقيت واحد ماسك متر وعايز يقيس بية درجة الحرارة !!
المثال دة ممكن يضحكك ... لكن واللــــــــــــــــــــــــــه
هتقابل ناس فى حياتك بتعمل أكتر من كدة .... وهتلاقى نفسك مش لاقى حل غير اقتباس
اية بتقول ..
"ويخلق
ما لا تعلمون" .
الجاهلية مش فى نوع اللبس او التفصيلة او نوع
الموبايل .. او معلومات انت عارفها او وزير مسك اية او مين جاب جون الفوز كاس
العالم 88 .... الجاهلية مصطلح لا يتواجد فى الكون الا فى منطقة اسفل شعر الرأس
تسمى بالمخ ... ملهاش دعوة بأى حاجة تانية ...
الجاهلية هيا طريقتك فى استخدام اللى تعرفة
وشروطة ... القصة مش فى المعلومة نفسها .. القصة انت هتقولها لية والاهم من كدة
هتقولها ازاى ...
انت عارف لو كل المعادلة دى صح والمعلومة نفسها غلط .. هتلاقى
اللى يصلحهالك .. ويبقى الطرفين كسبانين ... مش مصدق !!
أطلع فوق وقرا المثال بتاع
الراجل اللى بيقيس درجة الحرارة وأبقى قولى درجة الحراة طلعت كام بالمتر ....
ليست هناك تعليقات