طاقية الاخفاء

#طاقية الاخفاء

وانا صغير زى أى طفل ساذج ... لما كنت بتفرج على التليفزيون اوعلى

 الكارتون بصفة خاصة كنت بقعد أقلد الشخصيات البطولية ... وخصوصا الابطال

 الخارقين ... وكنت اقعد افكر مثلا اية اللى ممكن اعملة عشان اكتسب القوى الخارقة

 دى !!

... يعنى مثلا نفسى اعرف اطير ... نفسى اعرف اتنفس تحت المية .. نفسى ابقى قوى

 لدرجة  انى مافيش حاجة تعرف تموتنى ....

لحد ما اتفرجت فى مررة على فيلم "طاقية الاخفاء" ...

 الفيلم دة بالنسبة ليا كطفل كان نقطة تحول ... كل القوى الخارقة اللى اتفرجت عليها

 واتمنتها قبل كدة كوووم وانى يبقى عندى  القدرة على اخفاء نفسى قدام الناس دى

 كوووم تانى .

بغض النظر عن احلام المراهقين اللى كانت شاغلة بالى 24 ساعة يوميا ... مش دى

 القصة ..

القصة انى فعلا لما فكرت ساعتها وجدت ان مافيش اى حاجة فى الدنيا ممكن تساوى 

انك يبقى معاك القدرة دى على اخفاء نفسك من الناس لكن انت تبقى شايفهم وسامعهم .. 

دة فعلا الحلم اللى حلمتة سنين ...

الايام عدت ... 

وكبرت ... 

بدأت اتعرف على ناس ...

بدأوا يثقوا فيا .. بدأوا يتكلموا معايا ..

بدأوا يحكولى اسرارهم ومشاكلهم ...

 أسرار ممكن توصل لدرجة من الخصوصية ان محدش عارفها غير صاحبها وأنا  !!

ساعتها أفتكرت حلمى القديم اللى عمرة ما فارقنى .. "طاقية الاخفاء" .. انى اشوف

 الناس من غير مايشوفنى ... انى اعرف اسرارهم وهما ما يعرفوش اسرارى

ثوانى ثوانى !!

... الحلم اتحقق من غير الطاقية !!

.. الحلم اتحقق فعلا ... 

انا بقيت عارف اسرار الناس وهما لا .. هما لا .

هنا بقى كانت الوقفة ...

 انا مستفدتش حاجة !! ... دة حقيقى 
..

اية الفايدة اللى جتلى لما بقيت عارف اسرار الناس ...

ساعتها تفكيرى اتغير تماما ... انا كنت فاكر انى لما اعرف الناس قوى واسرارهم

 هيفدنى ويعتبر قوى خارقة ....

بس للأسف كل دى طلعت افكار طفل ساذج

... بل على العكس كمان .. انا بقيت بشارك صاحب السر فى هممة

... بقيت اخاف اتكلم مع اى حد لقع بكلمة غصب عنى

... بقيت بخاف من الناس من تقل وكتر اسرارهم ...

هنا خدت بالى من حاجة غايبة عنى جدا ... القوة نفسها فى انك تشوف الحاجة على

 حقيقتها قوة لا تقدر بثمن ...

طيب هوة اية اكتر شىء يهمنى انى اشوفة على حقيقتة .... !!

وجدت الاجابة الوحيدة المنطقية للسؤال دة هيا هيا نفس الاجابة لو سألتك اية هى اهم

 حاجة فى حياة الانسان ؟؟

الاجابة كانت "نفسة"

القوى الخارقة فعلا هيا انى اشوف نفسى على حقيقتها .. !!

ودة شىء صعب جدا ... والدليل على كدة ان فى ناس عاشت وماتت ومقدرتش تشوف 

نفسها على حقيقتها ... او بمعنى ادق .. مقدروش يواجهوا نفسهم بحقيقتهم ... بكل 

بساطة .. غمضوا عنيهم !!

مكانوش عارفين هما اتولدوا لية .. طيب بيعملوا كدة لية .. طيب هما عايشين لية .. 

طيب هما قادرين على اية .. طيب هما المفروض يغيروا اية ... 

مافيش اجابة !! 

مافيش حياة !!

فكر معايا كدة .. اية الفايدة اللى ممكن تعود عليك او اية القوة فى انك تعرف الناس قوى 

من غير ما تبقى عارف نفسك ... ولا اى حاجة .. صفر

انما انت لو فعلا قادر تعرف نفسك .. وتكون قوى انك تواجة نفسك بحقيقتها وتشوفها 

بطريقة موضوعية بعيدا عن التخيلات والاوهام والامراض النفسية والاحتياجات 

المريضة والعقول المغيبة .

ساعتها مش هتحتاج تعرف الناس اصلا .. لانك ساعتها هتعمل الشىء المناسب فى

 الوقت المناسب

ولما تحتاج شىء هتروح للشخص المناسب

هى دى فعلا القوة الحقيقية .. اللى اقوى من طاقية اللاخفاء بمراحل ...

 اعرف نفسك ..

 ساعتها هتعرف الناس ..

 ساعتها هتعرف تتعامل معاهم ..

 ساعتها هتنجح !

الخطوة الجاية بقى ... انك بعد ما عرفت نفسك على حقيقتها ... انك تبدأ فى السيطرة

 عليها .. المررة الجاية بقى .. تصبحوا على خير

#msalah