فراغ

 .. زى ما اتفقنا قبل كدة ان اول خطوة عشان تنجح فى اى عملية بتقوم بمناقشتها 

او التفكير فيها هى انك تضع تعريف لكل المعانى اللى بتدور فى ذهنك قبل النقاش

 او خلال تفكيرك , وبكدة هتبعد عن اللى احنا بنسمية الدائرة المغلقة اللى مالهاش

 أول من أخر .

يبقى أولا هنبدأ بتعريف كلمة فراغ ... "الفراغ" هو خلو الشىء .. يعنى ان الشىء

 دة يبقى فاضى .. طيب ماديا دى ظاهرة ممكن تحدث بغض النظر عن صعوبة

 تنفيذها انما علميا للأجسام المادية يمكن فعلا اننا نجعلها فارغة حتى من الهواء .

بس دة مش الموضوع اللى عايزين نتكلم فية ... الفراغ اللى بنتكلم علية انهاردة

 هوة الفراغ اللى بيخص النفس البشرية والعقل البشرى ... فى أنواع فراغ كتير

 قوى ممكن نتكلم علية على سبيل المثال ..زى الفراغ العاطفى , الفراغ الدينى ,

 الفراغ الفكرى .

تعالوا بقى نتكلم عن كل واحد منهم لوحدة شوية ..

وبنائا على رغبة الجماهير هنبدأ طبعا بالفراغ العاطفى ...

 

العاطفة كلمة كبيرة بتتلخص فى كلمتين وبس "أهتمام متبادل" وهى ان الأنسان

 بيشعر إنة لازم يشبع رغبتة فى الإهتمام بأنسان أخر غير نفسة وعلى شرط انة

 يحصل فى المقابل على الأقل بنفس درجة الأهتمام من الطرف الأخر تجاهة ...

ومن هنا تبدأ قصتنا ومشكلتنا ... وهى أن الأنسان بيترك الجزء دة من عاطفتة

 فارغ ومن هنا يبدأ دور العقل فى ملء هذا الفراغ .... ودة لة اشكال كتير ولكن

 كلها سيئة للأسف تتلخص مابين علاقات غير سليمة , أحساسيس مؤقتة وهمية

 تخفى داخلها رغبة مش أكتر ... وكلها بتنتهى للأسف بألم أو بشعور بالندم .

طيب إية حل هذا النوع من الفراغ ... الحل هوة انك تعطى الأخرين أهتمام

 وبالمقابل هتحصل أنت كمان على الإهتمام منهم ودة ممكن تعملة من خلال علاقات

 إجتماعية سليمة وصحيحة لها الكثير من الأشكال زى الأهتمام بالغير وصلة الرحم

 ومحاولة مساعدة الغير دون انتظار مقابل .

النوع التانى اللى هنتكلم علية هوة الفراغ الدينى ....

ودة أخطر أنواع الفراغ اللى ممكن تقابلة فى حياتك ... ودة ببساطة لأن العقيدة

 أساس من الاسس اللى بتقوم عليها الحضارات ... والحياة الادمية بشكل أكبر ..

 ودة بيبدأ مع تفكير الانسان انة بينتمى لشىء سواء كان قوة او معنى او أله بيتمثل

 فية كل من القوة والمعنى معاً .. الفراغ الدينى بيبدأ مع الانسان فى بحثة عن المثال

 الأعلى لمحاولة الانتساب لة .

وقلنا على هذا النوع من الفراغ انة أخطرهم على الاطلاق لان فى كتيــــــــــــر جدا

 بيسعوا جاهدين لأستغلال اى فرد بيحوى هذا الفراغ او بيتملكة هذا الفراغ لانة فى

 حالة أنة نجح فى ملء هذا الفراغ ليك بيكون تملكك تماما وبتكون خضعت لة بتبعية

 عمياء ودة هتجدة منتشر جدا على مر العصور ...

العديد من الانظمة او الدول او الجماعات الدولية او المحلية حاولت السيطرة على

 الناس عن طريق "رداء" الدعوة الى الدين او تحقيق أهداف دينية 

وبيكون السبب فى كل دة الفراغ الدينى اللى انت وضعت نفسك فية واللى انت بيهيأ

 لك انك بمجرد انتسابك للجماعة الدينية كمثال بتكون تخلصت من هذا الفراغ

 وتطهرت من كل ما يشوبك من أخطاء أو شبهات  او ذنوب ... والسبب الاساسى

 فى الفراغ الدينى كمان بيكون انقطاع همزة الوصل بين النفس البشرية وخالق هذة

 النفس واللى ببساطة جدا بيكون حلها متاح ليك وهو انك تعيد هذا الأتصال عن

 طريق الأتصال بخالق هذة النفس التى اصبحت تحتوى خراب وأللام نتيجة بعدها او

 انقطاعها عن مصدر الطمأنينة الوحيد ليها اللى هوة خالقها من الاساس .

النوع التالت اللى هننتكلم علية انهاردة هوة الفراغ الفكرى ...

وهنا المعنى هيتغير شوية وهتكون كلمة فراغ غير معبرة بشكل كبير عن المعنى

 اللى عايز اقولة .. الفراغ الفكرى هنا ببساطة هيكون عبارة عن غياب السبب

 الرئيسى للتفكير ... يعنى انك تفكر فى شىء من غير وجود هدف أو غاية لهذا

 التفكير .. ودة بنسمية السراب ... او الامتدادات .. فاكرين

إية الكلام المعقد دة !!!

طيب تعالى نبسطة شوية مع بعض ... مش أوقات كتير قبل كدة كنت بتيجى تحل

 مشكلة عندك بتلاقى نفسك قاعد مش عارف تبدأ منين وتلاقى نفسك ساكت والوقت

 بيعدى وانت قاعد بس حتى التفكير مش عارف تبدأ منين والمفروض انك تاخد

 قرار لكن بتعجز ... هوة دة انك بتبقى معاك كل الأدوات لكن مش عارف تبدأ

 أزاى ... وهنا بيكون الحل فى جملة واحدة "الرجوع الى القواعد الاساسية"

بمعنى انك هتمسك ورقة وقلم وهتأمر عقلك بأنة يتوقف فى الحال عن التفكير غير

 النافع وانة يوحد كل طاقتة فى استيعاب المشكلة ... الحل الوحيد اللى هيمكنك من

 دة هوة الورقة والقلم ...

عقلك أكبر مما تتخيل لكن الورقة مهما كبرت ليها حدود قدامك وانت شايفها ..

 خرج اللى فى عقلك فى الورقة اللى قدامك هتلاقى الموضوع أسهل وأوضع بكتير

 من الصورة اللى مصورهالك عقلك .

ملخص الكلام أن أى ألم بتشعر بية داخلك بيكون سببة فراغ أنت فشلت فى انك

 تملاة .. وسيبت الاخرين هما اللى يملوة بالنيابة عنك .

فى فراغ كبير قوى فى حياتنا لة أشكال كتير قوى وبنملى الفراغ دة بحاجات أو

 بأشخاص خاطئين وبيكون تبريرنا الوحيد ان الشىء المليان أحسن من الفاضى ...

 والتفكيردة بالظبط عامل زى اللى بيملى تانك العربية عصير او بييحاول يطفى

 الحريقة بأنة يرمى عليها جاز .

نفسك إن لم تشغلها بالحق شغلتك بالباطل.