"الشادوف" ومصر .

مشكلة اساسية من مشكلات العصر وتقريبا دى الاساس فى كل اللى بنمر بية حاليا فى مصر هى انعدام الكفائات .. ولما ترجع بكلمة كفائة دى لورا هتلاقيها نابعة من مصدر واحد .. "التعليم" ..

التعريف الصحيح للتعليم هى انك بتعلم العقل من صغرة على "المنهجية" ودة معناة انك مش بتقولة اى طريقة متبعة لصنع اى شىء .. بل انت بتعلمة الخطوات المتبعة لصناعة اى شىء .. طب اية الفرق بين انك تعلمة طريقة او انك تعلمة منهجية !!

الفرق كبير جدا وتقريبا دة الفرق الجوهرى بين تعليم الدول المتخلفة والدول المتقدمة .

لما تعلم واحد طريقة صنع شىء فأنت كدة بتحفظ واحد طريقة معينة تفصيليا لصنع شىء .. اى كان الشىء دة .. وهنا فى اكتر من مشكلة هتظهر تبعتها زى ان الطريقة دى متوافقة معا قدراتك انت بس يعنى لو علمتها لشخص قدراتة اقل منك مش هتحقق نتائج .. ولو علمتها لحد قدراتة اعلى منك هيحقق نفس نتائجك انت مع انة كان بسهولة ممكن يحقق اضعاف اضعاف نتائج - زى كمان ان الطريقة بتكون متقنة فى زمنها عن طريق الادوات والتكنولوجيا المستخدمة وبكدة فى حالة التقدم والتطور هيكون غير قادر على التطوير او اى مشكلة مركبة هتقابلة لان ادواتة غير متكافئة مع ظروف العصر .

تعالى بقى نتكلم عن المنهجية .. انك هتعلم الشخص دة خطوات معينة .. بتحقق نتيجة معينة

الفرق هنا ان الخطوات دى بتكون متوضحة الهدف منها وطريقها عملها ... وهنا انت عملت حاجتين مهمين جدا وانت مش واخد بالك .

اولا انت كدة مألزمتش الشخص اللى بتعلمة بمحتوى معين .. بمعنى انك وضعتلة الهدف والخطوات المنهجية دون اى الزام بطريقة معينة فى التفكير او ادوات معينة ودة هيفتح مجال كبير جدا للأبداع والفروق الفردية والقدرات .. وكمان غير ملزم بأى أدوات وبكدة مجال التطور ومواكبة العصر هتبقى عالية جدا .

هقولك مثال هيريحك من الكلام الكتير دة .. "الشادوف"

الشادوف دة اختراع بسيط جدا كانوا بيستخدموة زمان لما يحبوا يرفعوا حاجة تقيلة .. لو ببساطة يقللوا الطاقة اللازمة لتحريك  او رفع الاوزان الكبيرة .. دلوقتى الشادوف نفسة فى 2016 مش موجود لكن فكرة الشادوف نفسة موجودة فى اكتر من حاجة ... كل الرافعات العملاقة اللى بتقوم بنقل ادوات البناء والاطنان ورفعها لأماكن عالية ومحركات المياة .. وغيرة وغيرة وغيرة ... كل دة قايم على الفكرة الهندسية للشادوف .

.. هوة دة اللى انا بتكلم علية .. الشادوف فى حد ذاتة دة طريقة ... انما فكرتة بتعبتر منهجية .. المنهجية اتطورت عشان تواكب عصرنا واستخدمت فى اكتر من شىء ... انما الشادوف .. لسة زى ما هوة شادوف مالوش اى استخدام ومالوش اى قيمة دلوقتى .