الشيطان أذكى

الشيطان أذكى

الشيطان أذكى من قدرات العقل البشرى , ودة فى حد ذاتة شىء طبيى ميخوفش حد بما ان من طبيعة خلقة الله لة  انة شايفنا واحنا لاء

 
لكن اللى يخوف هنا النقطة اللى هنتكلم عنها انهاردة جديدة شوية اننا نطرحها على عقلنا

وهى ان عمر الشيطان ما هيحاول يوصلك للحقيقة دى فى حين انها واضحة زى الشمس

بل على العكس تمام !

هوة هيبدأ فى اقناعك بشتى الطرق انك ازكى ... وممكن تتغلب علية بعقلك المجرد دون الاعتبار للدين او اى شىء أخر .. بالعقل المجرد ..

ودة سبب كتير من الكوارث اللى بتحصل فى حياتنا نتيجة الثقة العمياء فى عقولنا واللى بنحاول نتحدى بيها كل شىء فى حين ان قدرتها كلها خادعة ومضللة لو انت مش راسم لها اطار تمشى جواها

الاوامر والنواهى الدينية فى الامور اللى بتخص حياتنا اليومية بتبدأ تنفر منها بمجرد انك تفكر قد اية هيا بتمنع عنك ملزات انت فى احتياج لها ...

 لكن عمرك فكرت انها مش بتمنعك .. دى بتحميك من انك تاخد خطوات فى طريق نهايتة حتمية وهى الخسارة

تعالى نتكلم بمثال حى للكلام اللى انا كاتبة

هنجيب مثال انا بعتبرة قوى جدا وقريب بشكل كبير وواضح كفاية للكلامى دة .

الاية الكريمة اللى بتقول 

بسم الله الرحمن الرحيم 

ولا تقربوا الزنا إنه كان فاحشة وساء سبيلا

صدق الله العظيم

هنا الامر كان قطعى ومباشر بعدم الاقتراب من الزنا

طيب لما هوة قطعى لية بقى شىء منتشر فى مجتمعنا !!

وكمان بقى مصدر دخل لناس كتير قوى بتعمل فى هذا الشىء

مش كدة وبس دة احنا كمان بنعتبرة خطاء عادى كأى خطاء وكمان كتير بندور لة على مبررات ودوافع وقللنا من قيمتة ككبيرة من الكبائر اللى حد عقابها فى الدين الرجم حتى الموت

لو مش مصدق ان دة حصل بالفعل ممكن تتفرج على التليفزيون والمسلسلات والافلام او تقرا جرنال الحوادث والاخبار وتشوف كام حالة زنا عامة .

واللى ببساطة جدا ممكن توريك ان دة شىء عادى ممكن يحصل ولة مبررات كمان !! 

طيب احنا ازاى وصلنا للدرجة دى من التدنى اننا بنبرر كبيرة من الكبائر بيهتز لها عرش الرحمان  !!

انا اقولك لية .. لاننا ببساطة شديدة وثقنا فى العقل المجرد وبعض المصطلحات اللى دخلت حياتنا منها

 الحرية المطلقة ..

حرية ارتكاب الخطاء كوسيلة من وسائل التعلم ..

اننا فى حاجات فى الدين كانت لها وقتها وان تطبيقها دلوقتى خاطىء تماما وغير مناسب لعصرنا الحالى ..

كل دة بالفعل مالوش اى اساس من الصحة بالنظر لتطبيقنا للمفاهيم دى ..

 انت فعلا لوبتستخدم عقلك كوسيلة للفهم كنت هتجد انها مبررات انت بتسطنعها لتبرير الخطاء لاغير .. 

نرجع للمثال الخاص بينا اللى بتحكية الاية الكريمة

الامر كان مباشر وصريح بعد الاقتراب من الزنا .... ولا تقربوا الزنا ...

طب هل دة اللى احنا فهمناة من الاية الكريمة

 لا

احنا بنشوفها كدة  "ولا تزنوا"

وفى فرق كبيييييير جدا بين " ولا تقربوا الزنا " و " ولا تزنوا" 

الاولى بتمنع انك تتخذ خطوات معينة يكون فعل الزنا نتيجة محتملة من نتائج الخطوات دى ...

يعنى من الاخر ابعد عن كل الخطوات اللى ممكن تؤدى بطريقة او بأخرى للزنا

طيب عشان اعمل كدة انا لازم ابقى عارف :- 

اولا : اية هوة تعريف الزنا عشان ابتعد عنة ؟

ثانيا : اية هيا الخطوات اللى المفروض ابعد عنها لانها ممكن تؤدى للزنا ؟

اولا الزنا طبقا للشريعة هو مضاجعة من لا تحل لك بالاتفاق ... وقلنا هنا بالاتفاق لان لو واحد اغتصب واحدة هيا فى الحالة دى لا تعتبر زانية لان دة لازم يحدث بموافقتها .

ثانيا : اية هيا الخطوات اللى ممكن تؤدى بيا للذنا ....

جميلة جدا الجملة دى وكبييييرة جدا وممكن تتكتب فيها كتب ودوواوين ...

انت عشان تبتعد عن كل السبل اللى ممكن تؤدى للزنا يبقى لازم تطبق حرفيا كل الاوامر الدينية اللى أمرنا بيها واللى بتحدد تعامل كل من الذكر والانثى فى الاسلام .

يبقى بما انى ذكر ... لو انا فاكر انى مفعلتش فاحشة الزنا ودة يبقى التطبيقالسليم للأية او الامر الالاهى  دة يبقى انا على خطاء ..

لان انا كدة بنفذ الاية لو بتقول "لا تزنوا " لكن الاية الفعلية او الامر الفعلى كان "لا تقربوا"

 . يبقى لازم انفذ كل التعاليم اللى بتحدد علاقتى وتعاملاتى مع اى انثى فى حياتى بما يتطابق مع الشريعة واحكامها

ودة مثال حى ودليل قاطع لية احنا وصلنا للدرجة دى من التدنى الاخلاقى والدينى .. بسبب التفيذ الخاطىء

واللى انا بشوفة من وجهة نظرى المتواضعة انة اسوء من عدم تنفيذ الامر الدينى اومخالفتة .... طب لية ؟

لان مخالفة الامر الدينى بطريقة مباشرة مش هتقفد الامر قوتة ومش هيحصل تحريف لاننا مخالفين لية ....

انما التنفيذ الخاطىء هيؤدى بالتبعية للتحريف ... وهنا مصدر المصيبة .

الشيطان بيبتعد على الجزئية دى فى كل الاوامر الدينية ... هوة مش بينفرك منها بشكل مباشر .. هوة بيحاول يتلاعب فى المبدأ نفسة او فى طريقة فهمك للأمر او بطريقة تنفيذك للمبدأ ... ومن هنا يبدأ التحريف ومع الوقت يتقتل المعنى الحقيقى للأمر الربانى وانت مش واخد بالك .

من هنا هتلاقى اللى بيصلى لكن سلوكة بيعد كل البعد عن الصلاة  

من هنا هتلاقى اللى بتلبس حجاب على شعرها لكن اغلب جسدها اشبة بالعراء 

من هنا هتجد اللى بيدافع عن مبدأة بأنة يقتل اللى واقف قدامة بحجة انة بيضحى بنفسة "او بغيرة عشان المبدأ يعيش" 

فى فرق كبير جدا انك تجتهد فى فهم الدين ... وانك تحاول تطبق الدين تبعا لأهوائك الشخصية ومعتقداتك .

الاولى هتطلب منك مجهود جبار وتوسع ثقافى كبير جدا .. لكن التانية هتطلب بعض الحجج اللى ملهاش اى مرجع .

أفهم دينك ... عشان تقدر تطبقة صح .

انت اللى لازم تسيطر على عقلك وانت اللى لازم تأمرة مش العكس